30 Jahre
nach der Wiedervereinigung
Verkehrte
Wölt in Stood
Verstoh
dat een? Dor harn wi doch de Wellervereenigung vun BRD un DDR in 1989. De
mehrste Lüe in´e DDR hebbt sick dormools bannig freut. De mehrste! Nich so sehr
de Parteifuzzis un de vunne Stasi. Oober de weern jo inne Minnerheet.
All den
annern de weern so wat vun happy. Se wuulln ruut ut dat Stootsgefängnis, rut
in´e Wölt, wulln schnacken könn ohne bang to ween dat se vielicht nästen Dach
in Knast wannert, wieldes de vune Stasi mithört un wat hört hebt, wat nich för
de eehr Ohrn bestimmt weer.
Jo, un denn hebt se jo so wat vun
luert op de Westmark. Se wulln so fix as möglich wech vune Ostmark. Westmark
in´t Portemonei un denn inkööpen allns, wat se vörher nicht köpen kunn.
Jo, so
weer dat. Un se hebt de Westmark kreegen taun gooden Wesselkurs.
Nur in
Stood, dor har dat nich so recht klappt mit den Wessel vun Ostmark in Westmark.
Dor hebbt se sick woll so freut ööber de Ostmark, dat se schon veele, veele
Johr trüch een Stroot na de Ostmark benannt hebbt.
Ostmark, hier in Westen!! Oober
irgendwie in den ganzen Wendetrubel - gooden Wesselkurs hin oder her - hebbt de
Stooder forgeten eehre Ostmark Stroot in Westmark ümtauwanneln. 30 Joohr na de
Wellervereenigung keem dann de Stooder CDU op de Idee denn Strootennoom
ümtauwanneln.
Is doch
nich mehr up to date!
De vun de
CDU hebt dat dann in Root inbröcht un dat Stooder Dachblatt het vun den Ploon
vun Noomwessel berichtet. Dor weer oober wat los in de Ostmarkstroot in Stood.
Mann in´e Tünn, wat hebt de Politikers dor´n Lawien lotpett. De Lüe in de
Ostmarkstroot wulln partu keen Wessel, de weern vull taufreden mit de Ostmark.
Kannst
dat glöben?
Dat weer de groote Stünn vun de SPD.
Wenn de Stooder in de Ostmarkstroot de Ostmark beholln wuln, schööt se doch. Un
de vun de FDP hebt ook irgendwat klooget öber Ost- un Westmark vertellt – hebb
ick oober weller vergeeten. Weer woll
nich so wichtig. Jo, un de vun de AfD harrn ook nix gegen Ostmark.
Worüm eegentlich?
Op jeden Fall geev dat keene Mehrheit
för den Ploon vun de CDU. De Ostmarkstroot blivt Ostmarkstroot un so blivt dat
ook dorbi, dat de eentige Ort in´t ganze wellervereente Dütschland, wo dat noch
Ostmark givt, uus Kreisstadt Stood is.
Kanns dat glöben? Ick nich!
Oober möt
ick denn öberhaupt allns verstoohn???
